शाळेचा इतिहास

किल्ले सदाशिवगड व गडाभोवती ऐतिहासिक वारसा लाभलेल्या राजमाची, बाबरमाची, वनवासमाची, हजारमाची आणि देशातल्या पहिल्या काच कारखान्याने जगाच्या औद्योगिक नकाशावर स्थान मिळविलेल्या ओगलेवाडीमध्ये सामाजिक बांधिलकी जपणाऱ्या मा. आत्मारामपंत ओगल्यांनी काच कारखान्याच्या कामगार व कर्मचाऱ्यांच्या मुलांना शाळेत शिक्षण मिळावे म्हणून ओगलेवाडीत पहिली माध्यमिक शाळा स्थापन केली. १९५० मध्ये बालविद्यालायाची सर्व व्यवस्था ’शिक्षण मंडळ, कराड’ या संस्थेकडे करण्यात आली. १ जून १९६१ मध्ये बालविद्यालायाचे ’आत्माराम विद्यामंदिर’ असे नामकरण करण्यात आले.

मराठी माध्यमाच्या आत्माराम विद्यामंदिरमध्ये आज केवळ ओगलेवाडीच नाही तर आजूबाजूच्या परिसरातील अनेक गावे व कराडमधील विद्यार्थी – विद्यार्थिनी शिक्षण घेत आहेत. शालेय अभ्यासक्रमाबरोबरच विद्यार्थांना शारीरिक शिक्षण, कला व क्रीडा प्रशिक्षण देऊन त्यांचा व्यक्तिमत्व विकास करण्यावर लक्ष केंद्रित केले जाते. शाळेत विविध स्पर्धांचे आयोजन केले जाते. शिष्यवृत्ती व स्पर्धा परीक्षांची तयारी करून घेतली जाते. विद्यार्थी संस्कारक्षम होण्यासाठी शाळेत राष्ट्रीय व सामाजिक महत्वाच्या सण – समारंभांचे आयोजन केले जाते.

शाळेतील सर्व अध्यापक वर्ग उच्चविद्याविभूषित, अनुभवी व निपुण आहे. शाळेचे ग्रंथालय प्रयोगशाळा सुसज्ज असून उत्कृष्ट शैक्षणिक साधनांचा उपयोग करून विद्यार्थांना अद्यावत पद्धतींनी प्रशिक्षण देण्यात येते.

शाळेला नामांकित माजी विद्यार्थांची परंपरा आहे. आंतरराष्ट्रीय व राष्ट्रीय स्तरावर विविध क्षेत्रात शाळेचे माजी विद्यार्थी काम करत आहेत. दरवर्षी प्रेरणादायी काम करणाऱ्या माजी विद्यार्थांना शाळेतर्फे ‘ प्रेरणा पुरस्कार’ देऊन सन्मानित करण्यात येते.

शाळेच्या सर्व उपक्रमांमध्ये पालकांचा सहभाग लक्षणीय आहे. सन - २०१८-२०१९ या शैक्षणिक वर्षात भारत सरकारच्या नीती आयोगामार्फत शाळेला विज्ञान प्रयोगशाळा समृद्धीकरणासाठी AIM - अटल इनोव्हेशन मिशन या योगनेअंतर्गत ATL अटल टिंकरिंग लॅब मंजूर झाली.